ភ្នំពេញ៖ អគ្គមេបញ្ជាការរងកងយុទ្ធពលខេមរភូមិន្ទ និងជាមេបញ្ជាការទ័ពជើងគោក លោក ហ៊ុន ម៉ាណែត បានលើកឡើងថា មនោសញ្ចេតនាត្រូវមានព្រំដែនកំណត់និងបានបញ្ជាឱ្យកាត់ចោលនូវភាពអសកម្មទាំងអស់ដើម្បីការពារអង្គភាព និងមន្ត្រីរបស់ខ្លួន។ លោកបានថ្លែងបែបនេះដោយសំដៅដល់បញ្ហាគ្រឿងញៀនដែលកើតមាននៅក្នុងកងទ័ពជាតិដោយមិនត្រូវឱ្យមានបញ្ហានេះនោះទេ។

ថ្លែងក្នុងពិធីមួយកាលពីថ្ងៃទី៩ ខែកក្កដា ឆ្នាំ២០២២ កន្លងទៅលោកឧត្តមសេនីយ៍ឯក ហ៊ុន ម៉ាណែត បានលើកឡើងថា ការបន្តទុកទាហានដែលញៀនគ្រឿងញៀនក្នុងអង្គភាពគឺកំពុងធ្វើបាបដល់ទាហានរូបនោះ ធ្វើបាបដល់ក្រុមគ្រួសាររបស់ទាហាននោះ និងកំពុងបំផ្លាញទាហានផ្សេងនិងក្រុមគ្រួសារទាហានផ្សេងផងដែរ។

លោកថា៖ «បើវាជក់ហើយវាចែកចាយ គឺវានាំគេខូច! ហើយបើយើងមិនកាត់វាទេយើងទុកហ្នឹងឱ្យវាសាបព្រោះពេលហ្នឹងមនុស្សផ្សេងតាំងខូចយើងមិនមែនធ្វើបាបមនុស្សម្នាក់គ្រួសារមួយ។ យើងធ្វើបាបដល់មនុស្ស១០នាក់ គ្រួសារ១០ ហើយឪពុកម្ដាយឱ្យចូលទ័ពដើម្បីវិន័យមិនមែនឱ្យចូលទ័ពដើម្បីចម្លងគ្រឿងញៀនទេ! នេះនៅក្នុងកងទ័ពជើងគោកតាំងពីខ្ញុំកាន់មកខ្ញុំឱ្យអនុវត្តន៍ហើយដូរច្រើន»។

លោកបញ្ជាក់បន្ថែមថា៖ «ខ្ញុំថាយោគយល់មានព្រំដែន។ អ្នកខ្លះផ្ដល់ឱកាសឱ្យ ឧទាហរណ៍អ្នកខ្លះពីដំបូងគេឱ្យយកទៅបណ្ដុះបណ្ដាលទៅកន្លែងអប់រំបាត់ជាត្រលប់មកវិញ កែខ្លួនអូខេ! តែបើអ្នកឯងមិនកែទេគឺត្រូវ(ដកចេញ)។ ហើយបើអ្នកចែកចាយគឺអត់អនុគ្រោះទេ!»។

លោកឧត្តមសេនីយ៍ឯក ហ៊ុន ម៉ាណែត ត្រូវបានតែងតាំងជាមេបញ្ជាការទ័ពជើងគោកនៅថ្ងៃទី៦ ខែកញ្ញា ឆ្នាំ២០១៨ ជំនួសនាយឧត្តមសេនីយ៍ មាស សុភា ដែលទទួលតួនាទីថ្មីជាទេសរដ្ឋមន្ត្រីទទួលបន្ទុកបេសកម្មពិសេស៕